၆

နှစ်ပေါင်း ၁၂၄ နှစ်နီးပါး ဗြိတိသျှကိုလိုနီနိုင်ငံဖြစ်ခဲ့သည့် မြန်မာနိုင်ငံ၏ အုပ်ချုပ်ရေးစနစ်မှာ ကြိုးနီစနစ်ဖြင့်သာ လည်ပတ်နေခဲ့သည်။ တရားဝင်ဖြစ်မှု၊ အလုပ်ခန့်ထားမှု၊ မြေယာပိုင်ဆိုင်မှု၊ အခွန်ကောက်ခံခြင်း၊​ မှတ်ပုံတင်၊ အိမ်ထောင်စုစာရင်း၊ ပင်စင်ခံစားခွင့်၊ ခရီးသွားလာခြင်း၊ လုပ်ငန်းလုပ်ကိုင်ခြင်းနှင့် ကုန်သွယ်ခြင်းတို့အပြင် နိုင်ငံရေးတွင် ပါဝင်မှုမှအစ ကိစ္စရပ်များအားလုံးအတွက် မှတ်တမ်းများ၊ အထောက်အထားများနှင့် အခြားသော စာရွက်စာတမ်းများကို တရားဝင်အထောက်အထာများအဖြစ် အသုံးပြုကြသည်။ တစ်ချိန်က အာရကန်ပြည်မြောက်ပိုင်းသည် မြန်မာနိုင်ငံတွင် အုပ်ချုပ်ရေး အတင်းကြပ်ဆုံးသော နယ်မြေများထဲမှတစ်ခုဖြစ်ခဲ့သည်။ မြန်မာနိုင်ငံ လွတ်လပ်ရေးရပြီးသည့်တိုင်အောင် ထို ကြိုးနီစနစ်ကို ဆက်လက်ကျင့်သုံးနေဆဲဖြစ်သည်။

ဆယ်စုနှစ်ပေါင်းများစွာ ဖိနှိပ်ခဲ့သော မူဝါဒများ၊ ခေတ်အဆက်ဆက် စစ်အစိုးရများက ကျင့်သုံးလာခဲ့သည့် ခွဲခြားဆက်ဆံမှုနှင့် ယိုင်နဲ့နေသောတရားစီရင်ရေးကြောင့် ထို အထောက်အထားများမှာ တန်ဖိုးမရှိသလိုဖြစ်နေခဲ့သည်။ ဆိုးရွားလှသည့် ဖိနှိပ်ညှင်းပန်းမှု၊ အကြမ်းဖက်မှုနှင့် နေရပ်ရွှေ့ပြောင်းရမှုတို့၏ သားကောင်ဖြစ်နေသည့်တိုင်အောင် ရိုဟင်ဂျာများသည် မိသားစု အမွေအနှစ်များကို ဖော်ပြနေသည့် အထောက်အထားများ၊ အာရကန်ပြည်နှင့် သမိုင်းကြောင်းအရ ဆက်နွယ်နေမှုဆိုင်ရာ အထောက်အထားများကို သိမ်းဆည်းနိုင်ခဲ့ကြသည်။ ထိုအထောက်အထားများကို မျိုးဆက် အဆက်ဆက် သေချာစွာ လက်ဆင့်ကမ်းခဲ့ကြပြီး တစ်ခါတစ်ရံတွင် လူမမြင်အောင် လျှို့ဝှက် သိမ်းဆည်းထားခဲ့ကြသည်။ ၂၀၁၇ ခုနှစ်က ဖြစ်ပွားခဲ့သည့် ‘နယ်မြေရှင်းလင်းစစ်ဆင်ရေး’ များနှင့် သိန်းချီသော ရိုဟင်ဂျာများ ဘင်္ဂလားဒေ့ရှ်သို့ အစုလိုက်အပြုံလိုက်ထွက်ပြေးခဲ့ရသည့် ဖြစ်ရပ်မှာမူ မကြုံစဖူးဖြစ်သည်။ ဝရုန်းသုန်းကားအခြေအနေများ၊ အကြမ်းဖက်မှုများနှင့် အိမ်များ၊ ရွာများ ပြာကျသွားသည်အထိ မီးရှို့ဖျက်ဆီးခံခဲ့ရသည့်တိုင်အောင် ရိုဟင်ဂျာများက ၎င်းတို့၏ နောက်ဆုံးကျန်နေသေးသော မိသားစုပိုင် အမွေအနှစ်များဖြစ်သည့် အထောက်အထားများကို အံ့သြဖွယ်ကောင်းလောက်အောင်ပင် မရရအောင် သယ်ဆောင်လာခဲ့ကြသည်။ အချို့မှာ ၁၈၀၀ ပြည့်နှစ်ကာလများက ရေးသားခဲ့သည့် ကိုယ်ရေးအထောက်အထားများနှင့် ဝါကျင်ဟောင်းနွမ်းနေပြီဖြစ်သည့် စာရွက်စာတမ်းများပင်ပါရှိသည်။

ယခုအခန်းထဲတွင် ထို ‘ကိုယ်ရေးအထောက်အထားများ’ ကို အတိတ်၏ အရေးပါပုံနှင့် ယနေ့အချိန်တွင် ထို အချက်အလက်များ၏ တန်ဖိုးရှိပုံတို့ကို လူတစ်ယောက်ချင်းစီ၏ ပြောပြချက်များနှင့် ပေါင်းစပ်၍ ဖော်ပြထားခြင်းဖြစ်သည်။

သီးသန့်ကြည့်ပါက ကိုယ်ရေးအထောက်အထားတစ်ခုချင်းစီမှာ လူတစ်ယောက်ချင်းစီ သို့မဟုတ် မိသားစု တစ်ခုချင်းစီ၏ အကြောင်းကို ပြောပြနေခြင်းဖြစ်သည်။ အားလုံးကို စုပေါင်း၍ ကြည့်ပါက ၎င်းတို့မှာ မြန်မာနိုင်ငံနှင့်ဆက်နွယ်ပါဝင်နေသည့် ရိုဟင်ဂျာလူထုအသိုက်အဝန်းတစ်ခု၏ တည်ရှိမှု အကြောင်းကို ပြောပြနေခြင်းပင်ဖြစ်သည်။